Bitcoin ઈઝ બેકઃ વધી રહેલી મોંઘવારી સામે ગોલ્ડના વિકલ્પ તરીકે ડિજિટલ કરન્સી ફરી માર્કેટમાં, 10 વર્ષમાં $500,000 પર પહોંચશે

Bitcoin ઈઝ બેકઃ વધી રહેલી મોંઘવારી સામે ગોલ્ડના વિકલ્પ તરીકે ડિજિટલ કરન્સી ફરી માર્કેટમાં, 10 વર્ષમાં $500,000 પર પહોંચશે

1 બીટકોઈન એટલે ભારતીય ₹16,87,316.48 થાયઃ અમેરિકામાં હેજ ફંડો અને મોટાં મોટાં કોર્પોરેટ ગૃહોએ બિટકોઈનમાં રસ લેવાનો શરૂ કરતાં માર્કેટમાં શોર્ટેજઃ પે પાલ જેવી કંપનીઓએ પણ કસ્ટમર્સને બિટકોઈનનો ઓપ્શન આપવાનું શરૂ કરી દીધું

 

નવી દિલ્હી

 

બિટ કોઈનની કિંમત પહેલીવાર $21,000ને આંબી ગઈ છે. જેને વિવાદાસ્પદ ટિજિટલ કરન્સી માનવામાં આવે છે તેણે દુનિયામાં ઘણાં લોકોને અબજોપતિ બનાવી દીધા છે, તો કેટલાક લોકોને ડૂબાડી પણ દીધા છે. ન્યૂયોર્કમાં વિશ્વની સૌથી વ્યાપક અને મોટી ગણાતી આ કરન્સીએ 21,293 ડોલરનો રેકોર્ડ તોડી નાખ્યો હતો. એવું કહેવાય છે કે બિટકોઈન આ રીતે જ વધશે તો આગામી દિવસોમાં તે એવા સ્થાને પહોંચી જશે જ્યાં ડોકું ઊચું કરીશું તો પણ દેખાશે નહીં. આ વર્ષે બિટકોઈને ત્રણ ગણો વધી ગયો છે. આવતા વર્ષે બિટકોઈન 30,000 ડોલર થઈ જાય તેવું માનવામાં આવી રહ્યું છે. જોકે, બિટકોઈનના વિનિમય સાથે સંકળાયેલા ટાઈલર એન્ડ કેમરોન વિંન્કલેવોસે તો ત્યાં સુધી કહ્યું છે કે આગામી 10 વર્ષની અંદર બિટકોઈન $500,000 સુધી પહોંચી જઈ શકે છે. ટાઈલર એન્ડ કેમરોન વિંન્કલેવોસના માનવા પ્રમાણે બિટકોઈન ગોલ્ડ કરન્સીથી પણ આગળ નીકળી જશે અને લોકો સોનાને બદલે બિટકોઈનનો સંગ્રહ કરતા થઈ જશે. 2020ના વર્ષમાં આખી દુનિયા સ્લોડાઉન અને લોકડાઉનની સમસ્યાનો સામનો કરી રહી છે ત્યારે બિટકોઈન એક માત્ર એવું ચલણ છે જે જોરમાં છે. કોરોનાના આ વર્ષમાં બિટકોઈન 170 ટકા સુધી ઉછળ્યો છે. 2017માં 19,000 ડોલરથી વધુનો તેનો ભાવ હતો તે 2020માં 19,864 સુધી પહોંચી ગયો હતો અને તે પછીના ટૂંકાગાળામાં બિટકોઈને હનુમાન કૂદકા મારવાનું ચાલુ રાખ્યું છે. ત્રણ વર્ષ પહેલાંની સપાટી તોડ્યા પછી બિટકોઈન હવે પોતાની અલગ પીક બનાવવા માટે આગળ વધી રહ્યો છે.

ભારતમાં જોકે, બિટકોઈન પ્રારંભના થોડા સમય સુધી કરન્સી તરીકે ચાલ્યો હતો પણ તે પછી રિઝર્વ બેન્ક ઓફ ઈન્ડિયા અને સરકારે આ ચલણ પર પ્રતિબંધ ફરમાવી દીધો હતો. એક સમયે એવું મનાતું હતું કે, ટેકનોલોજી અને ડિટિટલ એરા સાથે ડિજિટલ કરન્સીનો યુગ શરૂ થશે અને ફિઝિકલ ફોર્મમાં જે કોઈ ચલણ છે તેનું સ્થાન ડિજિટલ કરન્સી લઈ લેશે. જોકે, ક્રિપ્ટોકરન્સી તરીકે ઓળખાતી અર્થતંત્રની આ દુનિયામાં ફ્રોડ અને ફરેબ એટલાં બધાં એક સામટાં વધી ગયાં કે મોટાભાગના દેશોએ તેનાથી અંતર રાખવાનું મુનાસિબ માનવા માંડ્યું. આજથી 12 વર્ષ પહેલાં સૌથી પહેલાં બિટકોઈનનો જન્મ થયો હતો. એ પછી ડિજિટલ માર્કેટમાં આવાં 1500-2000 ચલણ આવી ગયાં છે. એક વખતે ગૂગલ પર લોકો સૌથી વધુ બિટકોઈનનો ભાવ સર્ચ કરતા હતા. પણ, હવે તે લગભગ બંધ થઈ ગયું છે. અત્યારે ગૂગલ પર તમે સર્ચ કરશો તો એક બિટકોઈનનો ભાવ તમને ₹16,87,316.48 જોવા મળશે.

બિટકોઈન કોઈ બેન્કે બહાર પાડ્યું નથી, તેના પર ટેક્સ લાગતો નથી

બિટકોઇન કમ્પ્યુટર કોડથી બનેલી ડિજિટલ (વર્ચ્યુઅલ કરન્સી) છે. લોકો તેને ઑનલાઇન ‘કૅશ’ તરીકે પણ ઓળખે છે. સાદા શબ્દોમાં કહીએ તો બિટકોઇન એક કમ્પ્યુટર ફાઇલ છે અને કોઈ સરકાર કે બેન્ક કે સંસ્થાનો તેની પર કોઈ અંકુશ નથી. બિટકોઇન સરકાર અથવા બૅન્કો દ્વારા છાપવામાં આવતું ચલણ નથી. માઇનિંગ નામની જટિલ પ્રક્રિયાથી બિટકૉઇન ક્રિએટ કરવામાં આવે છે. દુનિયાભરમાં કમ્પ્યૂટર નેટવર્ક પર તેને મોનીટર કરવામાં આવતું હોય છે. આ ચલણ કોઈ બૅન્કે બહાર પાડ્યું ન હોવાથી તેની પર કોઈ ટેક્સ પણ લાગતો નથી. બિટકોઇન ગુપ્ત કરન્સી છે અને તેને સરકારથી છુપાવીને રાખી શકાય છે. બિટકોઇનની મદદથી તમે સામાન કે સર્વિસ માટે ચુકવણી કરી શકો છો. જોકે, બિટકોઈનનો વપરાશ વ્યાપક નથી. બિટકોઇન સૌથી જાણીતી ક્રિપ્ટોકરન્સી છે પરંતુ, હજારો પ્રકારની ક્રિપ્ટોકરન્સીની લે-વેચ થઈ રહી છે, જેમકે રેડ કૉઇન, સિયા કૉઇન, સિસ્કૉઇન, વૉઇસ કૉઇન અને મોનરે વિગેરે.

બિટકોઇન રિસીવ કરવા માટે યુઝર પાસે બિટકોઇન ઍડ્રેસ હોવું જરૂરી છે જે સામાન્ય રીતે 27થી 34 અક્ષરો અને અંકોનું બનેલું હોય છે. આ એક વર્ચ્યુઅલ પોસ્ટબૉક્સ છે જ્યાંથી બિટકોઇનને મોકલી શકાય અને રિસીવ કરી શકાય છે. આની સાથે ખરું નામ અને ઍડ્રેસ રજિસ્ટર થતું નથી જેને કારણે કેટલાક બિટકોઇન યુઝર્સની ઓળખ છુપી રહે છે. બિટકોઈનની પ્રોસેસ એક ખાનગી બૅન્ક એકાઉન્ટની જેમ વર્તે છે. જો ડેટા ખોવાઈ જાય તો બિટકોઇન પણ ગુમાવી દીધા એમ કહી શકાય. જોકે તમારું બિટકોઈન વૉલેટ ખોલવા માટે આઈડી માગવામાં આવે છે.

બિટકોઇન અંગેના નિયમો પ્રમાણે બે કરોડ દસ લાખ બિટકોઇન્સ ક્રિએટ થઈ શકે છે. જોકે, એ સ્પષ્ટ નથી કે ત્યાર પછી શું થશે. ઉપયોગકર્તા બિટકોઇનને કમ્પ્યુટર કે મોબાઇલ ફોન પર બિટકોઇન વૉલેટ ઍપ્લિકેશન મારફત તેને ઇન્સ્ટોલ કરી શકે છે. વૉલેટના માધ્યમથી બિટકોઇન મોકલી શકાય છે અથવા મેળવી શકાય છે. લેવડદેવડની તમામ વિગત ‘બ્લૉક ચેઇન’માં નોંધાય છે. બ્લૉક ચેઇન એક ડેટાબેઝ સિસ્ટમ છે અને તેમાં તમામ વિગત નોંધવામાં આવે છે. આમાં પૈસાની લેવડદેવડ માટે બૅન્કની જરૂર નથી રહેતી. બિટકૉઇનના બધાં જ વપરાશકારો બ્લૉક ચેઇનથી જોડાયેલા હોય છે. આ કરન્સી માત્ર કોડમાં જ રહે છે. તે ફિઝિકલ નથી એટલે તેનો નાશ પણ નથી કે તેને જપ્ત પણ કરી શકાતી નથી.

બિટકોઈન અંડરગ્રાઉન્ડ પ્રવૃત્તિઓ કરનારા કે હવાલાથી નાણાંની હેરફેર કરનારાઓ માટે સ્વર્ગીય ચલણ બની જતાં સામાન્ય લોકો તેનાથી દૂર થઈ ગયા છે. એ પણ એટલી જ સાચી વાત છે કે ક્રિપ્ટોકરન્સીને કારણે ઘણાં લોકો માલામાલ થઈ ગયા છે. પ્રતિબંધો છતાં તે છેલ્લાં 12 વર્ષથી ટકી કર્યું છે અને વચમાં તેના મૂલ્યમાં કડાકો બોલાઈ ગયો હતો છતાં હવે તે સ્થિર થઈને હિમાલયની ટોચ પર જવા માટે થનગની રહ્યું છે. જેણે આ કરન્સી શોધી તે સાતોશી નાકામોટો બિટકોઈનને એક સામાન્ય ચલણ તરીકે જોવા માગતા હતા. જોકે, બિટકોઈન આટલું હાઈફાઈ અને મોઘુંદાટ હોવા છતાં તેનાથી રોજિંદી વસ્તુઓ જેવી કે દુધ-શાકભાજી ખરીદી શકાતાં નથી તે હકીકત છે. 2017ના વર્ષ સુધી તો ઘણાં બધાં લોકો ક્રિપ્ટોકરન્સીમાં રોકાણ કરતા હતા અને તેમને વિશ્વાસ હતો કે તેમાંથી વળતર મળી રહેવાનું છે. જોકે, તે પછીના વર્ષે બિટકોઈનના ભાવમાં 75 ટકાનો કડાકો બોલાઈ ગયો હતો. જે લોકોએ 100 રૂપિયા રોક્યા હતા તેનું મૂલ્ય રૂપિયા 25 થઈ ગયું હતું. અલબત્ત, તે પછી બિટકોઈને એવો જમ્પ માર્યો છે કે કોઈને પણ તેમાં વેપાર અને ઈન્વેસ્ટ કરવાની લાલસા થઈ આવે.

ટાઈલર એન્ડ કેમરોન વિંન્કલેવોસે કરેલા દાવા પછી તો ભલભલાને બિટકોઈનમાં રોકાણ કરવા માટેની લાલચ થઈ રહી છે. બિટકોઈન સોનાની જેમ સ્ટોર વેલ્યુ ધરાવે છે અને ગમે તેટલી મોઁઘવારી સામે તે રક્ષણ આપે છે તેવું ઘણાં લોકો માનવા પણ માંડ્યાં છે. CNBC ન્યૂઝ ચેનલને આપેલા એક ઈન્ટરવ્યૂમાં ટાઈલરે કહ્યું હતુંકે, તેમના માનવા પ્રમાણે બિટકોઈન ગોલ્ડ 2.0 છે. બિટકોઈન આવનારા સમયમાં ગોલ્ડને ફેંદી નાખશે અને જો આમ થશે તો સમજી લો કે બિટકોઈનનો ભાવ 5 લાખ ડોલર પર પહોંચી જશે. ટાઈલર કહે છે કે જો અત્યારના ભાવે પણ મળતા હોય તો તમારા માટે ઈન્વેસ્ટમેન્ટની એ સારામાં સારી તક છે કેમકે, અહીંથી તેની કિંમત આગામી સમયમાં 25 ગણી વધી જવાની છે. બિટકોઈન $19,864.15 પર આવ્યો ત્યારે ઓલટાઈમ હાઈ બન્યો હતો. ત્રણ વર્ષ અગાઉ તે 6.1 ટકા વધીને $19,306.35 પર સ્થિર રહ્યો હતો. ગયા શુક્રવારે બિટકોઈનમાં 8 ટકાનો ઘટાડો આવ્યો હતો અને ભાવ $17,000 ડોલરથી નીચે જતા રહ્યા હતા. સોમવારથી તેના ભાવમાં એકદમ ઉછાળો આવ્યો છે અને આ વર્ષના પ્રારંભથી લઈને અત્યાર સુધીમાં તેણે 170 ટકાનો ગેઈન કર્યો છે. હકીકત એ છે કે લોકોએ વચમાં ગુમાવેલો વિશ્વાસ પાછો આવવા માંડ્યો છે અને નવાને નવા રોકાણકારો આવી રહ્યા છે. વધી રહેલી મોંઘવારી સામે સોનું કોઈ કામનું નહીં રહે તેવી લાગણી લોકોને બિટકોઈન તરફ વાળી રહી છે.

જે લોકો બેન્કોથી દૂર રહેવા માગે છે તેમને માટે બિટકોઈન સેફ હેવન જેવું છે. બિટકોઈનની સાથેસાથે સાવ નાના ગણાતા ઈથેરિયમ, XRP અને  XRP-BTSPની વેલ્યુ પણ આ ગાળા દરમિયાન અનુક્રમે 5.6 ટકા અને 6.6 ટકા જેટલી વધી છે. જેમજેમ દિવસો વીતી રહ્યા છે તેમતેમ બિટકોઈનમાં મોટી મોટી કોર્પોરેટ કંપનીઓનો પણ રસ વધી રહ્યો હોવાનું કહેવાય છે. આ જ કારણથી બિટકોઈનને ભાવ આસમાનને સ્પર્શવા માંડ્યો છે. કેશએપ, રોબિનહૂડ અને પે પાલ જેવી કંપનીઓએ પણ હવે તેમના કસ્ટમર્સ માટે બિટકોઈનનો ઓપ્શન શોધી કાઢ્યો છે. અમેરિકાની જાણીતી હેજ ફંડ કંપની પાન્ટેરા કેપિટલે ગયા મહિને તેના તમામ ઈન્વેસ્ટર્સને લેટર લખીને બિટકોઈન વિશે જ્ઞાન આપ્યું છે. કેશ એપ અને પેપાલે તેમના 3 કરોડ કસ્ટમર્સને બિટકોઈન માટે તૈયાર રહેવા જણાવ્યું છે. ઘણાં લોકો બિટકોઈન માટે લાઈનમાં ઉભા રહેતાં હવે તેની અછત સર્જાઈ રહી છે. આ જ કારણથી છેલ્લા કેટલાક સમયથી બિટકોઈનમાં જોરદાર તેજી જોવા મળી રહી છે.

Leave a Reply

Your email address will not be published. Required fields are marked *

EnglishGujaratiSpanish
error: Content is protected !!